GureGipuzkoa.net |
Haga click aquí para ampliar© CC BY-SA:
KUTXA FOTOTEKA. FONDO MARIN. PACO MARI
"El Candado" jostailu-denda
1940., 50. eta 60. hamarkadetako Donostian, ohikoa zen jendea
saltokietako erakusleihoetan biltzea. Telebistarik ez zegoen garai
hartan, eta saltokiak baliabide ekonomiko ezin hobea ziren, atzerriko
munduarekin harremanetan egoteko, edo produktuei begira hasperen egiteko,
gehienek nekez lor zitzaketelako. Haurrek zeharo argi zuten hori, eta,
ametsak egi bihurtzeko, Errege Magoen borondatearen mende zeuden ia
erabat, urtero zer ekarriko zuten jakin ezinik (Olentzero ez zegoen
modan, oraindik ere).
70. hamarkadako haur askok orduak ematen zituzten
denda aurrean -bereziki Gabon aurreko garaian-, jostailuzko trena
ikusten, erakusleihoan zehar bueltaka. Ohikoa zen bi pertsona ilara ere
egotea, ekintza errepikakor horri begira. Lehenengo ilara haurrena zen,
eta atzekoa eurekin batera zihoazen pertsona helduena.
Dena dela, gauza guztiek dute amaiera: jostailu denda
beste lokal batera lekualdatu zen 70. hamarkadan, telebistak etxeak
hartu zituen, eta, handik denbora gutxira, “El candado" jostailu denda
desagertu, eta, haren ordez, "todo a cien" saltoki bat jarri zen.
Tamalgarria benetan…
GureGipuzkoa.net |
Pulse aquí para ampliar la imagen© CC BY-SA:
KUTXA FOTOTEKA. FONDO MARIN. PACO MARI
Carli optika (1950. urte inguruan)
Goiko argazkiko “El Candado” jostailu-dendaren Gabonetako erakargarria
jostailuzko trena zen, eta, Hernani kaleko 21. zenbakiko “Carli
optikaren” erakusleihoan, aldiz, jaiotza, Errege Magoak mugitu egiten
baitziren. Izugarrizko ikusmina sortzen zuen, argazkian ikus daitekeen
moduan.
GureGipuzkoa.net |
Pulse aquí para ampliar la imagen © CC BY-SA:
KUTXA FOTOTEKA. FONDO MARIN. PACO MARI
"Juguetes Marisol"
Argazkian, Juguetes Marisol ikus daiteke, eta
“Reyes” hitza duten kartel piloa ikusita, Gabon garaia dela ondoriozta
dezakegu. Kasu honetan, erakusleihoetan haur pare bat bakarrik dago,
jostailuei begira. Zein jostailu ikus daitezke erakusleihoan? Dendaren
atzealdean trizikloak eta panpinentzako kotxeak daude, zintzilik.
Lehenengo beira-arasan, arotzeria jokoa ikus daiteke, bere tresnekin:
zerra, kurrika, eskuila... Horretaz gain, miniaturazko autoak eta
sukalde-joko txikiak ere badaude. Erakusleiho handienean panpinak daude,
bakoitza bere sehaskarekin.
GureGipuzkoa.net |
Pulse aquí para ampliar la imagen. © CC BY-SA:
KUTXA FOTOTEKA. FONDO FOTO CAR. RICARDO MARTIN
"Sin Rival" tindategia
Idiakez kaleko 7. zenbakiko Sin Rival tindategiko
publizitateak honela dio: Kolore guztietako tinduak. Lehorreko garbiketa.
Doluzko jantziak 24 ordutan. Erakusleihoen gainean honela zioen:
Errenteriako artile-industria. Erakusleihoetan, garaiko hainbat janzki
ikus daitezke, eta barruan argi gutxi zegoela antzeman dezakegu.
Ezkerraldean atariko zenbakia irakur daiteke: 7 (Idiakez kalea).
Eskuinaldean, beste saltoki bat ikus dezakegu, eta erakusleiho
modernista zuela ematen du, estilo horretan ohikoak baitira mota
horretako kurbak.
GureGipuzkoa.net |
Pulse aquí para ampliar la imagen. © CC BY-SA:
KUTXA FOTOTEKA. FONDO MARIN. PACO MARI
"El Búfalo" kapusaiak (1950. urte inguruan)
Garibai kaleko 6. zenbakian zeuden El Búfalo euritako
jantziak. Lokalean bertan ekoizten zituzten salgaiak, eraikineko
lehenengo solairuan, hain zuzen. Argazkian, langileak (gehienak
emakumeak) denda aurrean daude, markaren ibilgailu baten alboan paratuta.
Simón Liceras jauna zen jabea (markesinan ikus daitekeen moduan, "El
Búfalo" errotulu nagusiaren azpian), eta hura hil zenean, alargunaren
esku geratu zen.
|