Oro har, Postak berak sortzen ditu bildumetan jasotzeko moduko objektuak. Baina
horiezaz gainera, filatelistek ere sortzen dituzte beren “obra filatelikoak”,
hainbat elementu sinkronizatuz. Sormen-lan horien artean, bi aipatuko ditugu
hemen: Lehen Zirkulazio Eguneko Kartazalak eta Txartel Maximoak.
Lehen Zirkulazio Eguneko Kartazala (SDP gaztelaniaz; FDC ingelesez) gai jakin
baten inguruko irudia jasotzen duen kartazala da, seilua eta lehen eguneko
zigilu-marka jarrita dauzkana. Marka hori berariazko diseinua izan daiteke, edo
besterik gabe seilua zirkulazioan jarri zeneko egunaren berri ematen duena.
Irudian, 1985eko abenduaren 11an jaulkiriko seiluari dagokion SPDa ikus daiteke,
Euskalerriaren Adiskideen Elkartearen fundatzaile Peñaflorida kondearen omenez
egina. Kartazalaren ilustrazioa Elkartearen betiko logotipoan oinarriturik dago,
eta Manuel Salvador Carmona grabatzaileak egin zuen XVIII. mendean; haren
sinadura azpialdean azaltzen da.
Txartel maximoa
Txartel maximoak ohiko txartelak dira, baina haietan koordinaturik ageri dira
txartelaren gaia, seilua (ilustrazioaren gainean jartzen dena) eta zigilu-marka.
Mota honetako txartelen bildumak egiteari maximofilia esaten zaio.
Irudiaren adibideak ezin hobeto ilustratzen du eman dugun definizio hori.
Ilustrazioa Gipuzkoako kostaldearen bista da Getaria herriaren inguruan.
Seilua (50 pezeta) Juan Sebastian Elkano marinel getariar ospetsuaren omenez
egin zen, 1976ko martxoaren 1ean.
Zigilu-marka berezia da, Filatelia Erakusketa antolatzeko egina (Donostian egin
zen 1976ko martxoaren 1etik 6ra bitartean) eta Elkano eta Txurrukaren omenez
egindako seiluak ditu kontuan. Zigilu-markak garbi uzten du, gainera, seilua
zirkulazioan jarri zen lehen eguna.
|