“Pasai Donibaneko Kale Nagusia”
Pasai
Donibaneko kaleak gozamen handia dira ibiltariarentzat. Behin eta berriro
topatzen dira ezusteko txokoak. Badirudi denbora izkina batean ezkutatu
dela eta jolasean dabilela bisitariarekin. Kale hauek, nolabait,
hiri-arkitektura tradizionala irudikatzen dute.
Ez dago
aukera handirik erdigunean paseatzeko. Kale bakar batek bereizten eta,
aldi berean, elkartzen ditu bi alboetara dauden etxe-ilarak. Batzuk itsaso
aldera zabaltzen dira; besteak, berriz, mendian gora igotzen dira.
Sarritan, itsasoan amaitzen diren kale estu perpendikularrak aurkituko
ditugu, baita mendi aldera egiten duten eskailera-mordo bat ere.
Bi
etxe-ilararen artean hogei bat metroko luzera duten pasabideak ikusten
dira, pertsona eta ibilgailuen jarioa ez eteteko. Pasabide horien barruan,
askotan, etxe baten ataria, saltoki baten sarrera, auskalo nora doan
eskailera bat… aurkitzen dira.
Hainbat
minutu paseoan eman eta gero, bisitaria toki ireki batera iritsiko da:
herriko plaza, itsaso aldera zabaltzen dena, nola ez. Han daude Udaletxea
eta frontoia. Aurrerago, erdigunetik kanpora, Bonantzako Santo Kristoren
basilika eta Santa Isabel gazteluaren aztarnak ikusten dira; eta, are
aurrerago, herritarrek “puntak” deitzen dutena, sanjuandarren finis
terrae partikularra, kaiaren bokaletik gertu dauden itsaslabarretan
gauzatua.
Argazkia:
JAS, 2005
Tokia:
Pasai Donibane
|