|
“Monolitoa”
EQUIPO 57
Altzairuz egindako bi xafla laukizuzenek osatzen
dute. Xaflek angelu zuzena eratzen dute eskulturaren azpialdean;
gurutzamendu-tortsio bat egiten dute erdialdean; eta goialdean, berriro
ere, angelu zuzena eratzen dute (azpialdekoaren beste norabide batean).
Maketa hirurogeigarren hamarkadan egin zen, eta 1990. urtean kokatu
zuten Donostiako Intxaurrondo auzoko biribilgune batean.
Equipo 57 Parisen jaio zen (1957ko
maiatzean). Artista hauek izan ziren sortzaileak: Jorge Oteiza (berehala
utzi zuen), Angel Duarte, Jose Duarte, Juan Serrano eta Agustin
Ibarrola. Aurrerago, beste hauek sartu ziren: Juan Cuenca, Nestor
Basterretxea, Luis eta Francisco Aguilera Amate. 1957an sinatu zuten
manifestuan, eraso egin zieten subjektibotasunari, surrealismoari eta
obra plastikoak izan dezakeen eduki emozional, indibidualista eta
literario orori. Indibidualtasunaren eta bereizte artistikoaren kontra
zeuden, eta sormen-lanak taldean egitea proposatu zuten.
Eskultore- eta pintore-talde honen ezaugarririk
aipagarriena espazioa da. Equipo 57 1961. urtean desegin zen; batetik,
irizpide ezberdinak zituztelako, eta bestetik, Ibarrola atxilotua izan
zelako.
Argazkia: JAS, 2005eko urtarrila
Tokia: Intxaurrondo Iparraldea. Donostia |