|
MARTZIAL AGIRRE
“Antonio de Okendo”
Martzial Agirre Lazkano (Bergara, 1840 – Donostia,
1900). “Algodoitegia” ehun-lantegiaren akziodun nagusienetako baten
semea izan zen, eta lantegian bertan jaio zen. Gipuzkoako Foru Aldundiak
beka bat eman zion Erroman ikasteko. Han, beste artista batzuen adiskide
egin zen, besteak beste, Palmaroli, Fortuny, Rosales eta abar.
Donostiako almirante entzutetsu honen estatua
Victoria Eugenia Antzokia eta Maria Cristina Hotela bereizten dituzten
lorategietan dago, Donostian. Marinak emandako kanoi batzuen burdina
urtuz egin zen, eta Victoriano Iraola zinegotziak hirian antolatutako
diru-bilketa bati esker eraiki zen. Lehen harria 1887. urtean jarri zen,
eta, bitxia bada ere, 1894ko irailean, igeltsuz egindako jatorrizko
eskultura inauguratu zen. Hiru hilabete geroago jarri zuten behin betiko
irudia, zuhurki.
Oinarria garrantzi handikoa da; izan ere, Marinaren
eta Gerraren alegoria batzuk jasotzen ditu, horma-hobi banatan, baita
Okendoren balentriak irudikatzen dituzten brontzezko erliebe batzuk ere.
Argazkia: JAS, 2005
Tokia: Okendoko lorategiak, Donostia
|